IXP Tarta de Santiago
A elaboración da “Tarta de Santiago” é un proceso artesanal transmitido de xeración en xeración, que foi evolucionando en función do progreso tecnolóxico experimentado nos últimos anos para atender as esixencias do mercado, sen perder a súa propia identidade. As técnicas empregadas na fabricación tenden a obter produtos de máxima calidade, mantendo os caracteres tradicionais das tortas amparadas por esta indicación xeográfica protexida.
Materias primas
O produto amparado pola IXP Tarta de Santiago é un doce tradicional galego, cuxos compoñentes básicos son:
- améndoas (mínimo 33% sobre o peso total da masa)
- azucre (mínimo 33% sobre o peso total da masa)
- ovos (mínimo 25% sobre o peso total da masa)
Existen dúas presentacións, torta forrada, é dicir, con base, e torta sen forrar.
Os forros representarán como máximo un 25% do peso total da torta forrada, e admítense dous formatos e composicións:
Forro de follado, no que os ingredientes son fariña de trigo, manteiga, auga e sal.
Forro de pasta brisa (ou brisé) no que os seus ingredientes son fariña de trigo, manteiga, azucre refinado, ovo enteiro, leite e sal.
Características do produto
As características da “Tarta de Santiago” son as seguintes:
- Forma: redonda con cuberta de azucre glasado onde figurará a Cruz da Orde de Santiago como sinal de identidade propia
- Aroma: típico a xema e améndoa
- Cor: cobertura branca en superficie debido á decoración con azucre glasado e cor dourada ao corte.
- Sabor: típico a améndoa.
- Textura: esponxosa e granulada.
