Queixo con forma de cogomelo ou de gorro de cociñeiro, cunha base cilíndrica de diámetro variable e cun sombreiro lixeiramente máis ancho. O seu contido en materia graxa está comprendido entre un 45 e un 60%.

O Cebreiro fresco non presenta codia diferenciada e a súa pasta é branca, granulosa, branda, arxilosa ao tacto, untuosa, fundente ao padal e de sabor lácteo lixeiramente ácido.

O Cebreiro curado ten a codia pouco diferenciada e a súa cor pode ir de amarela a amarela intensa, e pode presentar mofo dependendo da fase de maduración. A súa pasta de cor marfil pode chegar á amarela; cunha consistencia entre manteigosa, firme e ás veces dura dependendo do grao de maduración.

Sabor lácteo chegando a ser metálico e picante.

Comercialízase en fresco e curado, este último cunha maduración mínima de 45 días.