David

Chámome David e traballo como encargado en Leive Ecoadega dende hai algo máis de cinco anos. Cheguei un pouco por casualidade. Son de Vigo e trasladeime a vivir a Ribadavia. Coñecía a persoa que desempeñaba este posto previamente, e foi ela quen me convidou a substituíla, cando se viu obrigada a deixalo. Non tiña practicamente ningunha experiencia no sector, agás algúns esporádicos traballos en vendimas. Pero, axiña me fixen co traballo e con todo o que rodea a apaixonante cultura do viño e da súa elaboración. 
O meu traballo é moi variado. Ao tratarse dunha pequena adega, tanto atendo todas as faenas dos viñedos como as de elaboración dos viños, embotellamento, etiquetaxe e demais procesos da adega. E, como non, tamén a comercialización, promoción e distribución dos produtos. A diversidade do meu traballo é así de enorme; ás veces excesiva, mais gratificante por ese carácter global e integral de todo o proceso. 
O proxecto de Leive Ecoadega esperta especial interese por moitas razóns. A contorna na que está situada, no val do Avia, en Esposende (Cenlle), ao carón do Pazo de Ulloa, fai da súa localización un espazo privilexiado. O edificio, que ten unha longa historia, con partes que datan do século XVIII, xunto con engadidos máis modernos. O respecto polo patrimonio, material e inmaterial, o mecenado da arte (presente nas súas etiquetas) e do deseño, e a implicación no desenvolvemento local, fan desta adega algo diferente. Tamén a caracteriza que todos os seus viñedos están traballados con criterios de sostenibilidade, acolléndose ao Consello Regulador de Agricultura Ecolóxica de Galicia.

E algo fundamental: facemos todo con agarimo, pensando en ofrecer a máxima calidade aos consumidores de Leive, que son, para nós, máis que clientes, amigas e amigos.