Nacemos no ano 1992 no lugar de Pude, en San Simón da Costa (Vilalba), como un proxecto familiar ligado á nosa explotación gandeira. A idea xurdiu da necesidade de transformar o leite que producíamos nun produto de maior valor engadido, mantendo sempre o control de todo o proceso.

Desde o comezo tivemos moi claro o noso camiño: elaborar queixos artesanais de alta calidade, respectando a tradición, coidando cada detalle e apostando pola combinación entre saber facer e innovación. Co paso dos anos especializámonos no Queixo con DOP San Simón da Costa, sen deixar de lado outras elaboracións como o Queixo Tetilla, mantendo sempre a esencia da queixería galega.

Co crecemento do proxecto fomos ampliando instalacións, pero sen perder nunca o vínculo coa nosa orixe nin co territorio. Seguimos a traballar con leite da Terra Chá, unha das zonas leiteiras máis importantes de Galicia, e hoxe en día somos unha queixería de referencia dentro da DOP San Simón da Costa, recoñecida pola calidade constante e pola nosa fidelidade ao proceso artesanal.