Son Tamara Castro, segunda xeración dun obradoiro familiar, dunha panadaría artesá que abriu as súas portas no ano 1986 da man dos meus pais, Darío e Elia, que xa levaban tempo vencellados á panadaría e á repostaría tradicional. Medrei aquí, dentro deste espazo que é tamén parte da miña vida, dun xeito moi directo e especial, aprendendo desde nena o valor do traballo feito con calma, coas mans e co corazón.

A intención da nosa marca é protexer, transmitir e poñer en valor a cultura gastronómica da repostaría caseira da nosa zona, esa que naceu nas casas do rural galego. Queremos manter viva esa memoria doce que non entende de modas, e darlles voz ás verdadeiras protagonistas desta historia: as mulleres que, con creatividade e moito amor, elaboraban receitas a partir do que tiñan nas súas casas, convertendo o sinxelo en algo extraordinario.

En Sacrapastas seguimos fieles á esencia de sempre, mantendo a máxima calidade dos ingredientes e apostando por produtos de Artesanía Alimentaria. Porque cremos que no coidado do detalle e na orixe está o verdadeiro sabor de sempre, esa autenticidade que fai única a nosa galleta e que conecta directamente co corazón da tradición.