COELERNIS

Coelernis é froito dunha aposta pola vida tranquila e polo rural. Tras vivir nas cidades, Johnny Pérez Alonso atopa na apicultura a mellor forma de vivir no rural sen mudalo nin contaminalo. Ademais, sentía unha débeda coa contorna na que se criara, sendo a apicultura o xeito de agradecerlle ao rural e ao medio natural todo aquilo co que nos agasalla. Por iso, sente unha especial obriga coas abellas que propician o mundo no que vivimos e ofrecen os seus produtos naturais, revalorizando o seu labor. No que respecta ao nome, os Coelerni eran os castrexos que moraban preto dos seus colmeares, polo que a súa marca supón unha homenaxe aos seus devanceiros que, xa daquela, practicaban a apicultura.