Antonio Cajide Gulín

Chámanme Antonio Cajide Gulín, dende o ano 1999 levo dedicándome a isto en exclusiva. Sempre quixen facelo, sobre todo dende os 13-14 anos en que o meu avó paterno Miguel me ensinou a podar e  rodrigar, é dicir, atar con vimbio as  varas das viñas con rodrigas de madeira. Ademais dende moi pequeno o meu avó Saturnino con quen me criei, ensinoume a enxertar todo tipo de árbores froiteiras e a cultivar todo tipo de vexetais para autoconsumo, sempre dicía "hai que  ter do  teu".

Eu que case  nacín cunha cana na man e que soñaba coas troitas, aos 27 anos decidín colgar a cana e cambie esta gran paixón pola apicultura grazas ao amigo Paco Rego, co que tamén compartimos paixón pola viticultura. Pero cando cumprín os 40, decidín que a miña paixón sería en exclusiva a viña e o viño, e deixei as abellas aínda que sempre as teño en conta no meu traballo.

Dedícome  a todo o proceso, dende seleccionar os terreos e portaenxertos adaptados ás variedades, tipos de solos e altitudes ata chegar á botella de viño e a súa comercialización; ese é o meu labor, pechar todo o ciclo. Plantei cada variedade na cantidade necesaria para elaborar os distintos tipos de viño que comercializo (a mestura faise dende a viña)  e logo o enxertado e coidado dos viñedos. Gústame facer un seguemento con mimo dende a viña ata chegar ao produto final que consumides. Todo o noso agarimo e coidado metido nunha botella para que ti o desfrutes.