Pablo Manuel Padín

Son Pablo Manuel Padín de Bodegas Pablo Padín, unha empresa familiar con máis de 30 anos de historia. Nos 80, coa popularidade do viño da DO Rías Baixas e a variedade Albariño en alza, os meus pais comezan un pequeno proxecto dedicado á súa elaboración e venda no crecente mercado rexional, profesionalizando unha actividade con longa tradición no núcleo familiar. En 1984 empeza a tomar forma coa ampliación dos viñedos. Neses primeiros anos elabóranse estes viños no “ alboio” do garaxe da casa, coa colaboración da familia e veciños. A partir de aí, a actividade trasladarase ás instalacións da actual adega que comeza a construírse, e dótase con todo tipo de equipamento para a elaboración de viño.
Isto supón que o meu desenvolvemento persoal sexa paralelo ao da adega. Dende a infancia, xogando na adega entre as caixas de cartón e depósitos, merendando nos viñedos e, algunha vez, descansando sobre palés de viño. E a medida que vou medrando, a curiosidade trasládase á vinificación e á actividade dos enólogos, fascinado co súa gran cantidade de probetas, matrices e demais material para a análise de mostos e viños. Cando era posible tamén acompañaba os meus pais en viaxes que me permitiron coñecer diferentes realidades e ter unha perspectiva máis ampla do sector. Todo iso facilita a miña incorporación na adega, o inicio dunha substitución xeracional e o espertar de inquedanzas respecto ás posibilidades de vinificación da uva Albariño, o cal deriva no desenvolvemento dos primeiros viños espumosos da DO Rías Baixas.