María Cuba

Son María Cuba Alonso da Queixería Don Crisanto, situada na parroquia de Lanzós no concello de Vilalba. Formo parte desta empresa familiar, fundada no ano 1990 polos meus pais: Crisanto e Dolores. Foron eles os que decidiron arriscarse e iniciar este proxecto queixeiro coa idea de mellorar a economía familiar, transformando o leite de produción propia, xa que nese momento contaban cunha pequena explotación de vacas. Corrían tempos difíciles e como tiñan tres fillos, José Ramón, Rocío e mais eu, María, que son a máis nova, pensaron que sería unha boa idea para axudar a sacalos adiante. A día de hoxe, mantemos a nosa propia explotación de vacas, xestionada polo meu irmán José Ramón, da que obtemos o leite para elaborar os nosos queixos. A miña irmá Rocío e máis eu encargámonos da queixería, sempre coa supervisión e axuda dos nosos pais. 

Xa polo ano 1990, cando rematabamos as nosas tarefas no colexio, e sendo aínda moi pequenos, axudabamos na casa, tanto na explotación de gando coma na queixería. Quizás por iso, cando rematamos os estudos, os tres tivemos moi claro que queriamos continuar axudando os nosos pais, dándolle continuidade ao proxecto que eles comezaron e vivir no rural. Grazas a que os nosos queixos encaixaban ben cos gustos dos clientes, a demanda foi crecendo e a aposta por formar parte da empresa foi cada vez máis decidida.

Nos comezos o noso mercado abarcaba só Galicia, pero co paso do tempo aumentamos a venda dos nosos produtos no resto de España, e a día de hoxe tamén exportamos.

Para min, traballar no rural  é un luxo e un privilexio. Podemos desfrutar da natureza, da tranquilidade, da comodidade e, como non, de toda a boa xente que nos rodea, cheos de bos produtos e  boa gastronomía. Animo a toda a xente nova a que aposte polo rural. Que dende a Administración se poñan as cousas máis sinxelas e se dean facilidades para que os mozos e as mozas queden na zona. Que se a terra non se traballa, non hai produtos, e sen produtos non hai vida.