ABA de Trasumia

A adega está situada no corazón do Camiño Portugués a Santiago de Compostela ao seu paso polo Concello de Barro. É un fermoso lugar, con lugares como a fervenza do Río Barosa, situada a menos de 1 km de distancia da adega. Anímate a visitar esta subzona da DO Rías Baixas, seguro que farás grandes descubrimentos. E se ademais estás interesado en saber máis de nós, en como elaboramos os nosos viños, non dubides en contactar. Dende o ano 2018 estamos adheridos á Ruta do Viño Rías Baixas e realizamos visitas guiadas á adega e ao viñedo con degustación dos nosos viños. Durante a visita realizaremos unha charla explicativa sobre o ámbito da denominación de orixe e coñeceremos algo máis sobre os nosos comezos nesta aventura. Se che gusta a enoloxía, poderás comprobar in situ todo o proceso de elaboración dos nosos viños. Percorreremos as instalacións da adega, para finalizar coa degustación, a través dunha cata comentada dos nosos albariños “Moraima” e “Aba de Trasumia”, ademais do Caíño tinto “Moraima”. Tamén se elaboran viños tintos na DO Rías Baixas, convidámoste a descubrilos.