Convídote a que explores a nosa contorna como o fan as nosas abellas en busca de flores. Percorridos co río Sor como protagonista, onde poremos atención plena na vexetación existente, recurso clave para que as nosas abellas poidan producir o mel, o ouro doce da natureza. Tras o esforzo físico realizado no percorrido recorreremos ás propiedades terapéuticas do mel. A través dunha cata comentada dos nosos produtos recuperarás a túa enerxía. Aí van as nosas suxerencias:
Ponte Segade - Refuxio Cascón- Ponte Segade
Este itinerario iníciase na beira dereita do río Sor na Área recreativa de Ponte Segade, río arriba. O percorrido segue co curso do río ata a área recreativa e refuxio de Cascón onde pasando pola pequena ponte sobre o Sor volveremos pola outra beira ata o punto de inicio. Este percorrido permítenos descubrir aspectos interesantes relacionados coa cultura tradicional destas terras e coa vexetación e a fauna da ribeira.
Ponte Segade- Refuxio de Salustio-Ponte Segade
Este itinerario comeza na área recreativa de Ponte Segade. Tomamos o sendeiro que arranca río abaixo pola súa marxe esquerda, até o refuxio de Salustio, e despois de atravesar a ponte, regresamos ao punto de partida remontando o río pola outra beira. A área recreativa de Ponte Segade foi unha das primeiras acondicionadas para o desfrute e conservación do medio e como apoio para os pescadores. Novamente a vexetación de ribeira será a nosa protagonista.
Ambosores - Ribeiras do Bispo - Ponte Segade
Partindo de Ambosores, o percorrido lévanos pola parte alta do río Sor, dende o seu nacemento como tal na confluencia dos regatos de Tras da Serra e do Santar ata o curso medio rematando na área recreativa de Ponte Segade, onde poderemos descansar e tomar forzas.
