PACO & LOLA VINTAGE

Paco & Lola é unha adega nova e moderna, comprometida cunha forma de facer e de experimentar o viño diferente. A súa imaxe distinguida e arriscada, as súas ganas de saírse do establecido e a creación dunha marca de recoñecemento mundial integran os tres piares da filosofía Paco & Lola. Estes piares están detrás de todo o que fan, desde o deseño das botellas, envolvidas nos seus característicos lunares, ata o proceso de elaboración dos seus viños. Paco & Lola fundouse no ano 2005 por iniciativa dun grupo de viticultores e viticultoras da comarca do Salnés, que decidiron profesionalizar a súa produción. Esta cooperativa denomínase “Sociedade Cooperativa Vitivinícola Arousá” e actualmente está constituída por 436 socios, sendo a cooperativa máis importante por número de socios da DO Rías Baixas. A adega conta con 270 hectáreas de viñedo propio repartidas en máis de 2.200 parcelas de moi diversas superficies, localizadas na súa totalidade na subzona do Val do Salnés. Os socios e socias da cooperativa son o principal valor diferencial, a suma de todas estas parcelas características do minifundio galego achegan a súa diversidade e permítenlles elaborar viños diferenciados.